Moti për ditën e sotme po merr një kthesë të rrezikshme në gjithë Europën Qendrore, me Gjermaninë në qendër të vëmendjes. Sipas vlerësimeve të fundit, pritet një përshkallëzim i ndjeshëm i kushteve të motit në orët e pasdites dhe mbrëmjes, me një sistem stuhish që po zhvillohet nga Alpet e Veriut dhe po lëviz drejt veriut dhe lindjes.
Zona më e prekur do të jetë padyshim pjesa jugore e Gjermanisë, veçanërisht Bavarisë dhe Baden-Württemberg, ku pritet një situatë jashtëzakonisht e trazuar atmosferike. Shtresa ajrore është e ngarkuar me lagështi dhe energji, dhe kjo e ka kthyer terrenin në një fuçi baruti për formimin e superqelizave të fuqishme.
Jo vetëm që pritet të ketë reshje të dendura dhe stuhi të rrufeshme, por edhe rreziqe serioze nga tornado, erëra të dhunshme me shpejtësi deri në 130 km/h dhe breshër i cili mund të arrijë deri në 10 cm.
Ndërkohë, kjo situatë ekstreme nuk kufizohet vetëm brenda territorit gjerman. E gjithë zona që përfshin Francën Lindore, Zvicrën, Austrinë, Çekinë dhe Poloninë Jugore, është në një nivel rreziku të lartë.
Sipas vlerësimit të përgjithshëm për rajonin, është shpallur një status “Outbreak” – një sinjal alarmi që zakonisht jepet kur priten episode të shumta të motit ekstrem brenda një periudhe të shkurtër kohore, me potencial për dëme të mëdha dhe rrezik real për jetën në raste të izoluara.
Ajo që e bën këtë situatë veçanërisht të rrezikshme është përqendrimi i disa fenomeneve të forta atmosferike në një zonë të vetme dhe në një afat kohor shumë të ngushtë. Nga pasditja e sotme dhe në orët e mbrëmjes, pritet që kjo stuhi të kalojë me shpejtësi, por të lërë pas dëme të konsiderueshme, veçanërisht në zonat ku breshëri dhe erërat e fuqishme përplasen njëkohësisht me reshjet e shiut. /MeteoKosova/
English 
Albanian