Zyrtarisht në verë: Sot, në orën 10:24 ndodhi solstici veror – njëkohësisht shënohet dita më e gjatë e vitit

Sot, më 21 qershor 2026, në orën 10:24, ndodhi Solstici Veror, duke shënuar fillimin astronomik të verës në hemisferën veriore dhe ditën me numrin më të madh të orëve me dritë gjatë vitit.

Por çfarë ndodh në të vërtetë gjatë solsticit veror?

Toka rrotullohet rreth Diellit duke qenë e anuar rreth 23.5 shkallë në boshtin e saj. Ky anim është arsyeja kryesore pse kemi stinët, pasi gjatë vitit ndryshon këndi me të cilin hemisferat e Tokës marrin rrezet e Diellit.

Gjatë solsticit veror, hemisfera veriore është e anuar maksimalisht drejt Diellit, duke marrë më shumë energji diellore dhe më shumë orë ndriçim. Në këtë ditë, Dielli arrin pozicionin më verior në qiell, lind më herët dhe perëndon më vonë se në çdo ditë tjetër të vitit.

Ndërkohë, në hemisferën jugore ndodh e kundërta, atje shënohet Solstici Dimëror, pra dita më e shkurtër dhe nata më e gjatë e vitit, pasi ajo pjesë e Tokës është e anuar në drejtim të kundërt nga Dielli.

Pas këtij momenti, edhe pse vera sapo ka nisur, ditët fillojnë gradualisht të shkurtohen dhe netët të zgjaten pak nga pak, deri në ardhjen e solsticit dimëror në dhjetor.

Në zonat pranë Rrethit Polar Arktik, gjatë kësaj periudhe ndodh një fenomen i veçantë i njohur si “Dielli i mesnatës”, ku Dielli mund të qëndrojë mbi horizont për 24 orë pa perënduar.

Dita më e gjatë, por jo domosdoshmërisht më e nxehta

Edhe pse solstici veror shënon ditën me më së shumti orë me dritë gjatë vitit, kjo nuk do të thotë se është edhe dita më e nxehtë.

Temperaturat më të larta zakonisht regjistrohen disa javë më vonë, kryesisht gjatë muajve korrik dhe gusht. Kjo ndodh sepse sipërfaqja e Tokës, tokat dhe oqeanet vazhdojnë të grumbullojnë nxehtësi edhe pasi drita diellore ka arritur kulmin.

Ky fenomen njihet si “vonesa sezonale termike” dhe shpjegon pse periudha më e nxehtë e vitit zakonisht vjen pas ditës më të gjatë. /MeteoKosova/