Të shtunën, më 21 qershor, kemi hyrë zyrtarisht në stinën e verës, ndërsa kjo javë do të karakterizohet nga fuqizimi i masave të nxehta me origjinë nga Afrika Veriore. Megjithatë, këto masa nuk do të jenë krejtësisht stabile, pasi në pjesën e dytë të javës, veçanërisht të premten, pritet të depërtojë një front i dobët ajror.
Nën këto kushte, moti do të jetë me diell dhe vranësira të pakta gjatë ditës, prej sot e deri të enjten. Vetëm sot nuk parashihen fare vranësira, ndërsa nga e marta ato do të jenë të pranishme në mënyrë të lehtë dhe kalimtare.
Të enjten mund të ketë edhe ndonjë reshje të izoluar, kryesisht në zonat malore. Temperaturat do të shënojnë rritje graduale nga dita në ditë, duke arritur kulmin të enjten, kur parashihet të shkojnë deri në 38°C.
Të premten, pas orëve të mëngjesit me diell, gjatë ditës pritet depërtimi i frontit të dobët ajror, i cili do të sjellë shtim të vranësirave, rrebeshe lokale shiu dhe shkarkesa rrufesh. Si pasojë, temperaturat maksimale do të pësojnë një ulje të lehtë.
Masat më të freskëta, me origjinë nga veriu i kontinentit, do të shtrihen më tej gjatë fundjavës. Edhe pse të dobëta, ato do të mjaftojnë për të sjellë ulje më të ndjeshme të temperaturave, për disa gradë, duke i zbritur rreth apo nën vlerat 30°C. Pavarësisht kësaj, moti pritet të mbetet kryesisht me diell.
Era do të fryjë e lehtë dhe mesatare përgjatë javës, ndërsa nga dita e premte do të fitojë intensitet, duke qenë herë pas here mjaft e fuqishme, me shpejtësi prej 15-55 km/h.
Temperaturat minimale do të lëvizin prej 10 deri në 21°C, ndërsa ato maksimale prej 26 deri në 38°C.
/MeteoKosova/
Vala e të nxehtit – Si të mbrohemi?
Me temperaturat që këtë javë pritet të arrijnë deri në 38°C, është e rëndësishme të kemi kujdes të shtuar për shëndetin, veçanërisht për grupet më të ndjeshme si fëmijët, të moshuarit dhe personat me sëmundje kronike. Më poshtë janë disa këshilla praktike për mbrojtje nga temperaturat e larta dhe ekspozimi në diell:
Shmangni qëndrimin në diell
- Evitoni ekspozimin e drejtpërdrejtë në diell nga ora 11:00 deri në 17:00.
- Qëndroni në ambiente të freskëta ose në hije sa më shumë të jetë e mundur.
Pini mjaftueshëm ujë
- Hidratohuni vazhdimisht, edhe nëse nuk ndiheni të etur.
- Shmangni pijet me shumë sheqer, kafeinë apo gaz.
Vishuni lehtë dhe me rroba të përshtatshme
- Zgjidhni rroba të lehta, pambuku dhe me ngjyra të çelura.
- Përdorni kapele me strehë të gjerë dhe syze dielli për mbrojtje shtesë.
Freskoni ambientet
- Mbani dritaret dhe perdet mbyllur gjatë orëve më të nxehta.
- Përdorni ventilatorë ose kondicionerë kur është e nevojshme.
Përdorni krem mbrojtës ndaj diellit
- Aplikoni krem me faktor mbrojtës (të paktën SPF 30), veçanërisht në lëkurën e ekspozuar.
- Riaplikoni kremin çdo 2 orë nëse qëndroni jashtë.
Kufizoni aktivitetin fizik
- Shmangni aktivitetet fizike intensive në orët e nxehta.
- Nëse puna ju detyron të qëndroni jashtë, bëni pauza të shpeshta në hije dhe pini ujë rregullisht.
Duke ndjekur këto këshilla, mund të përballojmë më lehtë ditët me temperatura të larta dhe të reduktojmë rrezikun nga dehidratimi apo goditja nga i nxehti.
Albanian 
English