Asteroidi rreth 100 metra i gjatë, rrezikon të përplaset me Tokën në vitin 2032! Ja ku parashihet të bie

Një asteroid i madh mund të kalojë mjaft afër Tokës brenda dekadës së ardhshme saqë ekziston një mundësi që ai të godasë planetin, sipas NASA-s.

Shkëmbi hapësinor, i quajtur 2024 YR4, ka një diametër midis 50-100 metra dhe mund të godasë Tokën në vitin 2032, sipas Qendrës së NASA-s për Studimet e Objekteve Afër Tokës.

Por kjo mundësi është e ulët, me vetëm një shans prej 1.3% që asteroidi të bëjë një përplasje të drejtpërdrejtë me planetin më 22 dhjetor 2032, sipas ekspertëve të hapësirës.

Astronomët që monitorojnë teleskopin ATLAS në Universitetin e Havait e vërejtën për herë të parë asteroidin teksa ai po largohej nga Toka më 27 dhjetor dhe e raportuan atë në Qendrën e Planetëve të Vegjël të Unionit Ndërkombëtar Astronomik, e cila përcaktoi se ai nuk ishte parë kurrë më parë.

Asteroidi 2024 YR4 ka një orbitë “interesante”. Rruga e tij e zgjatur e çon asteroidin rreth diellit dhe në afërsi të Tokës përpara se të largohet shumë përtej orbitave të Marsit dhe Jupiterit. Në të kaluarën, edhe pse ka kaluar përmes sistemit të brendshëm diellor më parë, ai nuk ka kaluar gjithmonë aty ku ndodhej Toka, ku mund të kapej lehtësisht. Ky është arsyeja pse asteroidi u zbulua vetëm së fundmi.

Për shkak të orbitës së tij unike, astronomët po përpiqen të mësojnë gjithçka që mundin rreth 2024 YR4 përpara se ai të zhduket nga pamja pas prillit. Nuk pritet të jetë sërish i dukshëm deri në vitin 2028.

Fundin e vitit 2032 astronomët e parashikojnë si momentin kur 2024 YR4 do t’i afrohet sërish Tokës, duke shtuar se vëzhgimet e mëtejshme pritet të sigurojnë të dhëna që do të mbështesin mundësinë që 2024 YR4 të shmangë goditjen me Tokën.

Astronomët vlerësojnë madhësinë e asteroideve bazuar në sasinë e dritës që ato reflektojnë. Bazuar në të dhënat aktuale, 2024 YR4 është mjaft i madh për të shkaktuar dëme të lokalizuara nëse do të godiste një qytet të populluar.

Çfarë ndodh nëse ai godet Tokën?

Nëse asteroidi 2024 YR4 do të godiste Tokën, pasojat do të vareshin nga përbërja e tij. Nëse ai është një grumbull i lirshëm shkëmbinjsh dhe pluhuri, ai do të shpërthente në atmosferë në lartësi të madhe, një fenomen i njohur si shpërthim ajror (airburst).

Një ngjarje e tillë do të prodhonte një valë tronditëse të fuqishme dhe nxehtësi ekstreme, duke ndikuar në sipërfaqen e Tokës, e ngjashme me shpërthimin e vitit 1908 mbi lumin Tunguska në Siberi, ku më shumë se 2.000 kilometra katrorë pyje u dogjën dhe u shkatërruan.

Nëse asteroidi është një shkëmb solid apo edhe një objekt metalik, ai mund të krijojë një krater deri në një kilometër në diametër. Një ngjarje e ngjashme ndodhi rreth 50.000 vjet më parë, kur një asteroid goditi atë që sot njihet si Arizona, SHBA, duke formuar kraterin e famshëm Barringer.

Shpërthimi i përplasjes do të shkaktonte shkatërrim brenda një rrezeje prej rreth 50 kilometrash. Një ngjarje e tillë do të kishte fuqinë e një bombe hidrogjeni jashtëzakonisht të fortë, por pa rrezatim radioaktiv. /MeteoKosova/